|
Qasaarihii ka dhashay dagaalkii xalay ka dhacay Muqdisho.
July ,02.2008 (HawiyeNews.com)
Waxaa isa soo taraya qasaarihii ka dhashay dagaalkii
xalay ka dhacay qeybo ka mid ah degmooyinka Hodan iyo Waaber ee
magaalada Muqdisho, kaasoo u dhexeeyay xoogaga hubeysan iyo ciidamada
Yugandha oo ay wehliyeen kuwa Itoobiyaanka iyo kuwa dowladda KMG
Soomaaliya.
Dagaalkaas oo la isu adeegsaday hubka noocyadiisa kala duwan ayaa
waxaa inta la ogyahay ku geeriyootay 21 ruux oo u badan dad rayid ah,
ku dhawaad ilaa 20 ruux kalena dhaawacyo ayaa ka soo gaaray, iyadoo
badi dadka wax ku noqday dagaalkaas ay madaafiic iyo rasaas ugu tagtay
xaafado ka fog fog goobaha dagaalku ka soconayay, gaar ahaan xaafado
ku yaala degmooyinka Wadajir, Waaberi, Hodan iyo Xamar JabJab kuwaas
oo qaarkood si weyn uga fogaa halka lagu dagaalamayay.
Dad dhaawac ah iyo meydad xalay ku baryay goobihii ay rasaasta culus
iyo midda fudud ugu dhacday ayaa saakay la gaarsiiyey Cusbitaallada,
halka kuwii geeriyooday ee aan la aqoonsanna la bilaabay in la duugo,
kuwii la aqoonsadayna eheladooda ay duugteen, iyadoo ay jiraan dad
dhaawacyo soo gaaray awgii ugu dhiig baxay halkii ay rasaastu kula
habsatay kagadaal markii la waayay cid Isbitaal geysa ama Gaadiid
qaada maadaama xilli habeen ay ahayd, ciddii dhaqaaqdana ay ka baqeyso
in la toogto.
Dhinaca kale waxaa saaka degan goobaha ay shalay iyo xalay dagaallada
ka dheceen ee degmooyinka Waaberi iyo Hodan waxaan si caadi ah u
shaqeeynaya gaadiidka dadweynaha, goobaha ganacasi ee halkaas ku yaala,
isu socodka dadkuna waa sidiisii caadiga ahaa, inkastoo dadku ay
saakay baqdin weyn qabeen.
Dhalinyarada ragga ah ee degan xaafado ka mid ah degmooyinka Waaberi
iyo Hodan gaar ahaan kuwa sida aadka ah ugu dhow dhow goobihii
dagaaladu ka dheceen ayaa iyagu salaadda subax markii la tukaday kadib
guryahooda ka baxay iyagoo maciinsanaya xaafado kale si ay uga
badbaadaan haddiiba ay dhacdo in baaris ay ka sameeyeen ciidamada
dowladda KMG Soomaaliya iyo kuwa Itoobiyaanka xaafadaha dagaalladu ka
dheceen, taasoo ay ciidamadu ku qabqabtaan dhalinyarada mararka qaarna
ay dilal u geystaan, balse wax baaris oo dhacay maba jiraan,
xaaladduna wey degan tahay.
Dagaalka shalay ilaa xalay fiidkii ka soconayay degmooyinkaas ayaa ka
soo bilowday fagaaraha Tarabuunka ee degmada Hodan oo ciidamo ka
tirsan kuwa dowladda KMG Soomaaliya ay ku leeyihiin fariisin, kuwaas
oo markii la soo dardaray kadib xooggaga hubeysani ay u soo tallaabeen
Xaafadda Taleex ee isla degmada Hodan, iyadoo kadib dagaalku uu ku sii
faafay degmada Waaberi iyo isgoyska KM.4 oo ay ku sugan yihiin
Ciidamada Yugandha, kuwa Itoobiya iyo kuwa dowladda KMG Soomaaliya,
halkaasoo uu ka dhacay dagaalkii ugu qaraaraa abide ee Muqdisho soo
mara billooyinkan dambe.
Dhinaca kale waxaan weli la ogeyn qasaaraha soo kala gaaray dhinacyada
dagaalamay oo iyagu isku hurgufayay hub culus iyo mid fudud, iyadoo
hubkaas qaarkii uu hareer dhaafayay goobaha ay ku dagaalamayaan
dhinacyadaas oo xaafado fog fog u tallaabayay, xaafadahaasoo dad rayid
ah oo u badan carruur iyo haween ay waxyeello ugu geysteen.
Email:
hawiyenews@gmail.com
|
