Saraakiil ka tirsan DF oo siminaar ugu socda Addis Ababa.

june ,16.2008 (HawiyeNews.com)
Magaalada Addis Ababa ee xarunta dalka Ethiopia waxaa muddooyinkii ugu dambeeyay ku sugnaa saraakiil sar sare oo ka tirsan Dowlada KMG ah ee Soomaaliya kuwaasoo howlo shaqo la sheegay inay halkaasi u joogaan.

Saraakiishaan Soomaalida ayaa kulamo la leh Saraakiisha ciidamada Ethiopian-ka ee magaalada Addis Ababa ku sugan, iyagoo kala hadlaya xaalada ammaan ee dalka Soomaaliya gaar ahaan magaalada Muqdisho iyo sidii ciidamada DF iyo kuwa Ethiopian-ka iska kaashan lahaayeen howlaha ammaanka lagu sugayo.

Qaar kamid ah saraakiishaan ayaa lagu soo waramayaa in Siminaar ugu socdo maagaalada Addis Ababa iyagoo wax laga barayo qaababka ciidamada iyo sida loo xalin karo ammaan darada dalka Soomaaliya.

Saraakiishaan ku sugan magaalada Addis Ababa ayaa la sheegay inuu hogaaminayo Taliyaha ciidanka xooga dalka Soomaaliya Jen. Siciid Maxamed Xirsi "Siciid Dheere" oo dhawaan Madaxweyne Cabdilaahi Yuusuf Axmed xilkaasi u magacaabay.

Saciid Dheere ayaa Saxaafada u sheegay inay wax weyn ka korarsadeen isaga iyo saraakiisha la socota siminaarada iyo wada tashiyada ay la yeesheen saraakiisha ciidamada Ethiopian-ka ee magaalada Addis Ababa ku sugan.

Waxuu sheegay in Ethiopia ay tahay dalka ugu awooda ciidamada badan Africa isla markaana ciidamadeeda heystaan tababaro xoogan oo dhinaca Militariga ah sidaasi darteedna ay u yimaadeen inay aqoon ka faa'iideystaan.

Waxa uu sheegay in marka dib ugu laabtaan Soomaaliya wax weyn ka badali doonaan xaalada ammaan xumo ee ka jirta gaar ahaan magaalada Muqdisho ee caasimada Soomaaliya.

Taliyaha waxuu sheegay in xerooyinka ciidamada Ethiopia ku jiraan xiligaan 3000 askari oo ka tirsan ciidamada Dowlada KMG ah ee Soomaaliya kuwaasoo uu sheegay in tababar xoogan u socdo dhawaana dib ugu soo laabanayaan magaalada Muqdisho oo markii hore laga qaaday.

Si kastaba ha ahaatee, dowlada Ethiopia ayaa ah dowlada inta badan tababarada u fadisa ciidamada DF iyo saraakiishooda kuwaasoo aan ilaa hada waxba ka qaban ammaan darada kasii hureysa dalka Soomaaliya gaar ahaan magaalada Muqdisho.
 

Email: hawiyenews@gmail.com