Labada shariif oo xilkii laga xayuubiye.

July ,22.2008 (HawiyeNews.com)Wararka iminka naga soo gaaraya magaalada Asmara ee xarunta dalka Eritrea ayaa sheegaya in hogaan cusub loo magacaabay Isbaheysiga dib u xoreynta Soomaaliya.

Guddoomiyaha Isbaheysiga dib u xoreynta qeybta fulinta waxaa laga dhigay Sheekh Xasan Daahir Aweys halka Guddoomiyaha golaha dhexe laga dhigay Shariif Saalax oo kamid ah dhamaantood xubnaha Asmara ku sugan.

Sheekh Xasan Daahir Aweys oo daqiiqado kahor Xogta Online la xiriirtay ayaa sheegay inuu aad ugu faraxsan yahay go'aankaan la qaatay waxuuna sheegay inaysan saacadaan waxii ka bilowda jiri doonin Sheekh Shariif iyo Shariif Xasan sheegashadooda ah inay yihiin Guddoomiyaasha Isbaheysiga dib u xoreynta Soomaaliya.

Waxuu ku eedeeyay inay galeen qiyaano qaran isla markaana jilaafeen shacabka Soomaaliyeed oo uu sheegay inay heshiis la galeen dowlada Ethiopia iyo dowladaha xasilooni darida Soomaaliya jecel sida uu hadalka u dhigay.

Sheekh Xasan Daahir Aweys waxa uu carabka ku adkeeyay inaysan marnaba xabada joojin doonin ilaa dalka ka baxaan ciidamada Ethiopia waxuuna diiday inay dalka yimaadaan ciidamo QM ka socda.

Gudoomiyaha Isbayhsiga Dib xoreynta Soomaaliyeed Sheekh Shariif Sheekh Axmed oo ku sugan Magaalada Jabuuti oo la hadlayay daqiiqado kadib markii warkaan uu soo baxaty TV-ga Aljaziira ayaa sheegay inay xubnahaas yihiin 24 islamarkaana ay sharci daro tahay waxa ay ku dhawaaqeen, xubno tiradaas la egna aysan xil ka qaadi karin cidnana u dhiibi karin wuxuuna ku tilaamay ay koox gaar ah maleegtay.

Si kastaba ha ahaatee, khilaafkaan keenay in xilka laga qaado labada shariif ayaa keeni kara in gudaha dalka ku dagaalamaan ciidamada magacyada Isbaheysiga iyo Maxkamadaha kala wata ee ku kala fikir duwan heshiiskii Jabuuti.
 

Email: hawiyenews@gmail.com