Taliyaha Saldhiga Madaniga ee Magaalada Jowhar Sheekh Max'ed Cusmaan oo saakay u waramayay saxaafada  ayaa sheegay Sababah keenay in la xir xiro ganacsatada ay tahay in ay diideen isticmaalka lacagaha duugaha ah iyo kuwa jeex jeexan ee shilinka Soomaaliga waxaana uu intaa ku daray in ganacsatada loo soo xir xiray falkaasi ay gaarayaan ilaa 11 ruux oo ah dadka ugu caansan xaga ganacsiga ee Magaalada Jowhar ee Gobolka Sh/dhexe.

Sheekh Max'ed Cusmaan waxaa uu in taa raaciyay in dadkaasi ganacsatada ah ee haatan xabsiga ku jira Maxkammad la soo taagi doono kuwaasi oo diiday in ay isticmaalaan lacagaha jeex jeexan ee shilinka Soomaaliga waxan uu sheegay in arintaasi ayasan ka Maamul ahaan u dulqaadan doonin.

Ganacsatadaan ayaa shalay galab waxaa soo xir xiray Saraakiil ka tirsan midowga Maxkamadaha islaamiga ee ku sugan Magaalada Jowhar kuwaaso oo shalay gudaha u galay suuqyada Magaalada Jowhar.

Ganacsatada Magaalada Jowhar ayaa mudooyinkii ugu dambeeyay waxa ay diidanaayeen qaadhashada lacaga duuga ah iyo waliba kuwa jeex jeexan ee shilinka Soomaaliga taasi oo caqabad ku ahayd Shacabka ku dhaqan Magaalada Jowhar.

Horay ayaa waxaa inta badan dalka Soomaaliya u samaameeyay diidmada lacaga duuga ah ee shilin Soomaaliga taasi oo ay shacabka Soomaaliyeed kacdoon xoogan ka muujiyeen taasi oo markii danbe lagu guuleeytay in la meel mariyo.