HawiyeNews.com

Qaramada Midoobay ayaa mar kale codsaday in lasii daayo sarkaal ka tirsan Hay'ada UNHCR oo magaalada Muqdisho kooxo hubeysan afduub ugu heystaan.

Qaramada Midobay ayaa sheegtay in hoos u dhac ay u keeneyso afduubka sarkaalkan sare howlihii gargaar ee la gaarsiin lahaa dadka Soomaaliyeed ee ku dhibaateysan Soomaaliya kuwaasi oo lagu qiyaasay hal Milyan qof.

Waxaa kaloo ay QM sheegtay in aysan garaneyn ilaa iyo iminka sababta ka danbeysa afduubka Madaxii hey'adda UNHCR iyo cida ka danbeysa, taasoo dhibaato u keeneysa howlaha gargaarka bini'aadanimo ee laga wado Soomaaliya.

QM ayaa cambareyn xoogan u jeedisay kooxihii ka danbeysay afduubka Xasan Maxamed Cali "Keynaan", waxayna ugu baaqeen kooxaha heysta ninkaasi in si deg deg ah oo shuruud ku xerneyn loo soo daayo.

Dhinaca kale Madax hay'ada UNHCR Antonio Guterres ayaa dhankiisa ka cambareyay afduubka loo geystay sarkaalkasi wuxuuna dalbaday in si sharuud la'aan ah loo sii daayo Madaxii UNHCR ee Muqdisho.

Waxa uu ka codsaday Dowlada KMG ah ee Soomaaliya inay gacan weyn ka geysato sii deynta sarkaalkaasi waxuuna ugu baaqay kooxaha heysta inay shuruud la'aan dib xoriyadiisa u soo celiyaan.

Antonio Guterres ayaa sheegay in uu ahaa nin mudo ah ku sugnaa Soomaaliya isla markaana howlo dhinaca gargaarka ah u qaban jiray dadka Soomaaliyeed xili dalka amaan dari ay ka jirtay.

24-kii sac ee la soo dhaafay ayaa bartilmamed laga dhigtay Madaxda Hey'adaha Samafalka ee bulshada u taagan caawintooda, iyadoo shalay galab kooxo dabley ah ay bartamaha magaalada Baladweyne ku dileen Madaxii Hay'adda CRD ee Gobolada Dhexe Maxamed Xasan Kulmiye.

Si kastaba ha ahaatee, Soomaaliya waxaa caada ka noqotay in kooxo hubeysan afduub u geystaan dadka waxtarka u leh bulshada Soomaaliyeed gaar ahaan caawimaadiyaash Shisheeye ee gudaha Somalia ka howl-galo iyadoo kuwa badan lagu dilay gudaha dalka.