HawiyeNews.com

Ciidamada Nabad Ilaalinta AMISOM gaar ahaan kuwa Uganda iyo ciidamada Dowlada KMG ah oo iskaashanaya ayaa saaka howl-galo ka wada agagaarka garoonka diyaaradaha Aadan Cadde International Airport ee magaalada Muqdisho.

Howl-gaalkan ayaa ka dambeeyay kadib markii shalay hoobiyaal lagu weeraray garoonka diyaaradaha magaalada Muqdisho.

Hoobiyaashaasi mid kamid ahaa ayaa waxa uu ku dhacay xaruntii dugsiga sare ee farsamada gacanta oo ku dhegan garoonka diyaaraddaha waxana halkaasi ku nool dad masaakiin ah oo soo barakacay.

Madfacaasi ayaa haleelay sandaqad yar oo halkaasi looga ganacsanayey waxaana ku geeriyooday hal ruux halka afar kale oo haweeney uur laheyd ay ku jirtana ku dhaawacmeen.

Tirada kale ee Hoobiyeyasha ayaa waxay ku kala dhaceen inta u dhaxeysa Xeebta iyo Garoonka Diyaaradaha, halka mid ka mid ah uu ku dhacay wadada dheer ee ay diyaaradduhu ku ordaan, kana kacaan.

Waxa mudo yar hakad galay howlihii garoonka, iyadoo dadkii joogay ay khalkhal galey, waxayna dadka radsadeen meelo ay kaga gambadaan hoobiyeyaasha soo dhacayey.

Ma cadda in garoonka xiligaasi uu ka duulayey Ra'iisul wasaaraha oo la filayey in isaga iyo wafdi uu hoggaaminayey ay ka ambabaxaan magaalada Muqdisho.

Ciidamada AMISOM ayaa markii weeraradaasi dhaceen xeray wadada gasha garoonka diyaraddaha iyagoo halkaasi baaritano gaaban ka fuliyay goobta, mana ahan weerarkan midkii ugu horeeyay iyadoo labo jeer oo hore lagu weeraray Madaxweynaha Dowladda KMG Cabdullaahi Yuusuf Axmed.

Ciidamada AMISOM iyo kuwa DF ee maanta howl-galka wada ayaa wali la sheegin cid ay kusoo qabteen iyagoo galay guryo ay dadweyne rayid ah degan yihiin.

Hoobiyaashaan shalay lagu garaacay garoonka Muqdisho ayaa jirin ilaa iminka cid sheegatay mas'uuliyadeeda balse waxaa la rumeysan yahay inay fuliyeen kooxaha hubeysan ee Siyaasada DF kasoo horjeedana kana dagaalama gudaha magaalada Muqdisho iyo daafaheeda.

Si kastaba ha ahaatee, kooxaha DF kasoo horjeeda ayaa inta badan hoobiyaal la beegsada garoonka Aadan Cadde xiliga ay baxayaan ama kasoo dagayaan madaxda sar sare ee Dowlada KMG ah gaar ahaan Madaxweyne Cabdilaahi Yuusuf oo dhowr mar oo hore si dirqi ah hoobiyaashaasi ugu baxsaday.