Sida ay shegayaan wararka ka imaanaya dalka Jabuuti waxaa dalkaasia gaaray ergo ka kala yimid meelo kala duwan kuwaasi oo isku diyaarinaya sidii ay uga qeyb qaadan lahaayeen wadahadalo lagu doonayo in lagu dhex dhexaadiyo xubnaha isbeheysiga dib u xoreynta ee ku kala tagay arimo la xiriro heshiiskii dhawaan dhex maray dowlada KMG Soomaaliya iyo isbeheeysigaas xubno ka socday.

Wararka ayaa sidoo kale waxaa ay sheegayaan in dalka Jabuuti ay gaareen ergo ka kala tagtay dalalka dibada gaar ahaan wadamada reer galbeed iyo dalka gudihiisa iyo madaxda sar sare ee Isbeheesigaasi oo dhawaanahan ku suganaa magaalada Nairobi ee dalka Kenya.

Max’uud Axmed Nuur (Tarsan) oo ka mid ah xubnaha isbeheeysiga isla markaana ka mid ah  xubnaha dalka dibadiisa ka yimid ayaa waxaa uu saxaafada  u sheegay isaagoo ku sugan magaalada Jabuuti ee dalka Jabuuti in ay ku dedaalayaan sidii meesha looga saari lahaa qilaafka hereeyay isla markaan dhex dhexaadin loogu sameeyn lahaa xubnaha isbeheysiga ee ku kala aragati duwanaaday qaabkii dhawaan loo wajahay heshiiskii Jabuuti.

Ma jiro wax war ah oo ka soo baxay xubnaha isbeheysiga ee sida gaarka ah uu u hareeyay qilaafka kuwaasi oo ku kala sugnaa magaalooyinka Asmara iyo Nairobi ee dalalka Kenya iyo Eritrea.

Isbeheysiga Dib u xoreynta ayaa qilaafkooda uu soo ifbaxay kadib markii xubno ka tirsan isbeheysigaasi oo uu hor kacayo gudoomiyaha isbeheeysigaasi Shiikh Shariif Shiikh Axmed kuwaasi oo qalinka ku duugay heshiis ay la galeen dowlada KMG Soomaaliya kaasi oo lagu doonayay in meesha looga saaro dhibaatooyinka ka jira gudaha Soomaaliya.