june ,28.2008 (HawiyeNews.com)
 
Wararka aan ka heleyno degmada Xudur ee Gobolka Bakool ayaa sheegaya in aroornimadii hore ee saakay dagaal xoogan oo la isku adeegsanayo hubka noocyadiisa kala duwan uu ka qarxay, dagaalkaasi oo dhex maray ciidamada Dowladda KMG iyo kooxaha ka soo horjeeda.

Dagaalkan ayaa yimid kadib markii kooxaha ka soo horjeeda Dowladda ay weerar ku soo qaadeen degmada Xudur, iyadoo ciidamada Dowladda ee halkaasi ku sugnaa ay iska caabin xoogan kala hortageen kooxihii weerarka ku soo qaaday, warar soo baxaya ayaa waxay sheegayaan in kooxihii weerarka soo qaaday ay la wareegeen gacan ku heynta degmada Xudur, walow wararkaasi ay yihiin kuwo aan la xaqiijin.

Daryanka Madaafiicda iyo rasaasta kala duwan ee ay is weydaarsanayaan labada dhinac ayaa laga maqlayaa tuulooyinka ku xeeran degmada Xudur waxaana sidoo kale hawada ka baxay isgaarsiintii degmadaasi ay laheyd taasoo keentay in aan wax badan laga ogaan karin dagaalka halkaasi ka socda.

Kadib dagaal xoogan ayaa waxaa ku guulaystay gacan ku haynta degmada Xudur ee Gobolka Bakool kooxa ka soo horjeeda dawlada KMG oo mudo gaaban ku sugnaa dagmada xudur ka dibna isaga baxay.
 
Waxaa adag in la ogaado khasaaraha dagaaladan ay geysteen sababo la xariira isgaarsiinta oo hawada ka baxsan.

Gobolada Bay iyo Bakool ayaa waxaa ku sugan maliishiyooyin ka tirsan Ururka Al-Shabaab waxaana hoggaamiya Afhayeenka ururkaasi Sh. Muqtaar Roobow "Abuu Mansuur" oo qaabilsan howlgalada ururka Al-Shabaab ee Gobolada Bay iyo Bakool.
 

Email: hawiyenews@gmail.com